محمود الليثي عن تعاونه مع أحمد مكي: فنان عبقري وبتجنن لما بشوفه | فيديو
كشف المطرب محمود الليثي تفاصيل تعاونه مع الفنان أحمد مكي في أغنية آخرة الشقاوة، والتي حققت نجاحا كبيرا منذ طرحها على موقع يوتيوب، مؤكدًا أن مكي فنان عبقري.
وقال الليثي خلال ندوته بالقاهرة 24: أنا طول عمري عارف إن أحمد مكي دا عبقري من أيام ما كان عندي وصلة دش لما كنت عايش في إمبابة، وكنت بتفرج على أحمد مكي في الأفلام وبتجنن منه من أيام أتش دبور، وأتضح ساعتها أنه مخرج مش ممثل بس، ولما المخرج بيمثل بيبقى عبقري.
وواصل محمود الليثي: مكي جواه شحنة عبقرية مش في الكوكب وكان حلمي أشوفه، وفي يوم لقيت مديرة أعماله بتتصل بيا وتقولي مكي عايز يقابلك، وقالي عايز أعمل معاك أغنية، وفعلا اتفقنا على أغنية آخرة الشقاوة وقالي الجملة بتاعتك هتكسر الدنيا، والحمدلله الأغنية نجحت.
كما سبق وتطرق الليثي للحديث عن حبه لمطربي المهرجانات الشعبية، من بينهم حمو بيكا وعمر كمال، وقال في تصريح سابق لـ القاهرة 24: أنا بحب حمو بيكا لأنه أطيب إنسان ممكن الواحد يقابله في العالم بعد شعبان عبد الرحيم الله يرحمه، وبحب بردو حسن شاكوش لأنه راجل جدع، وبعتبر عمر كمال دا ابني لأني طلعته على إيدي.
أغنية آخرة الشقاوة
ويذكر أن أغنية آخرة الشقاوة حققت نجاحا كبيرا على موقع يوتيوب، حيث تخطت حاجز الـ 39 مليون مشاهدة على موقع يوتيوب، وهي من ألحان وتوزيع شادي السعيد.
