أبرز تصريحات غادة عادل في أنا والقناع: جربت المهدئات مرة واحدة وندمت ومش عارفة أكون أم
حلت الفنانة غادة عادل ضيفة على الإعلامية منى عبد الوهاب في برنامجها أنا والقناع عبر شاشة قناة الحياة، وكشفت العديد من الأسرار في حياتها.
وقالت غادة عادل إنها لم تأخذ مهدئات سوى مرة واحدة وقررت أن لا تكرر الأمر ثانية، موضحة: مش بحب المهدئات وزمان من 5 أو 6 سنين كان عندي ضغوطات بسبب انفصالي وحد نصحني آخد مهدئ، وقال لي أهم حاجة ما تبطليش غير براحة، ولما أخدته لقيت نفسي قاعدة والولاد بيتخانقوا وأنا عندي لا مبالاة لكن أنا كنت عاوزة أحس وانفعل وأشوف، وكانت أول وآخر مرة خد مهدئ في حياتي.
وأكدت غادة عادل، أنها قررت أن لا تجامل أحدًا، قائلة: بطلت أجامل في حياتي، وصاحبتي إنجي علي هي اللي شجعتني لأني كنت بتكسف أقول لأ، قالت لي اتعلمي تقولي لأ دلوقتي بقول آسفة مش هقدر.
وتحدثت غادة عادل عن والديها قائلة: موت ماما وبابا أكتر حاجة صعبة عليا وماحستهاش وقتها ولكن بعد شوية، لأننا مؤمنين أن في موت وربنا بينزل الصبر وبنكون مستعدين نفسيًا، لكن بعد شوية تحسي وجود الأب والأم سند وطمأنينة وضهر وراحة.
وأكدت غادة عادل أنها أصبحت لا تندم على أي شيء قائلة: مش بندم على حاجة وكل حاجة مرت عليا خلتني أقف على رجلي واتعلمت من كل أخطائي، وأنا شخصية سهل حد يأثر فيا ويسوقني.
وكشفت غادة عادل أن والدتها توفيت وهي بعمر عامين، قائلة: ما افتكرش أمي خالص ولو ما وروليش صورة ما كنتش هعرف أن والدتي توفيت ومرات أبويا هي اللي ربتني.
وأضافت: عمري ما أضايقت أني والدي أتجوز لأنه عمل كده علشان كنا صغيرين وماكنش عاوزنا نعيش من غير أم، وكان صعب أعيش من غير أم لأن الأب ينزل يشتغل وأنا بنت محتاجة أم تربيني وتعلمني حاجات وتفهمني حاجات.
مش عارفة أكون أم
وكشفت غادة عادل شخصيتها كأم قائلة: أنا أم حنينة بزيادة لدرجة الغباء ومش عارفة أكون أم لأني مش بعرف أقول لأ.
غادة عادل تبكي خلال حلقتها في أنا والقناع
وبكت غادة عادل خلال الحلقة قائلة: مش قادرة أستوعب أن في ناس شريرة، ولما كان في ناس شريرة في حياتي كنت بقول أكيد اللي عملوه ده بسبب الظروف، ومشكلتي ان قلبي رهيف جدا، وأكتر حاجة حلوة حصلت لي أني خدت وعد أني بجد لما أحس من بعيد أن الشخصية اللي معايا مش لايقا عليا ببعد لأني مش هعرف اخد حقي ومش عاوزة احس وحش في حياتي أبدأ.
