حسن شاكوش: كان نفسي عمرو أديب ييجي فرحي.. وتامر حسني قالي الدنيا غليت وفر فلوسك
كشف مطرب المهرجانات الشعبية حسن شاكوش عن العديد من الأسرار حول حفل زفافه، أبرزها: كواليس دعوة الفنان تامر حسني لـ حفل زفافه، بجانب التعليق على تصريحاته الأخيرة بشأن النجوم الذين دعاهم لـ حفل زفافه ولم يلبوا الدعوة، مؤكدًا أنه لم يهاجمهم.
وقال حسن شاكوش، خلال حواره مع الإعلامية بسمة وهبة، مقدمة برنامج «العرافة»، على قناة «المحور»: أنا كلمت تامر في التليفون في شغل وقولتله دا فرحي أنا وأنا عايزك في شغل وشوف هتعمل معايا إيه، قالي يا حبيب قلبي ألف مليون مبروك الدنيا غليت ووفر فلوسك، وجالي من غير مقابل هو وفرقته.
وأكد حسن شاكوش، أنه لم يهاجم من لم يلبِّ دعوة حفل زفافه، قائلًا: أنا مهاجمتش اللي مجاش فرحي، أنا بحب الناس دي وكنت بتمنى يكونوا موجودين في فرحي، ممكن الناس تفهمني غلط وتفتكر إني بهدد ولكن دي طريقيتي، أنا مش بحضر أقول إيه قبل ما أطلع اتكلم وبحب أكون على طبيعتي.
وتابع حسن شاكوش: كان نفسي أستاذ عمرو الليثي ييجي فرحي، وعمرو أديب والدكتورة بسمة وهبة ولكن أنا عذرتك لظروفك الصحية وقلبي معاكي.
حسن شاكوش يوجه رسالة لمن امتنع عن حضور زفافه
ومن جهة أخرى، سبق أن وجّه حسن شاكوش رسالة لمن امتنع عن حضور حفل زفافه، وذلك في لايف عبر حسابه بموقع فيس بوك قائلًا: أي حد ماجاش له عذره طالما عندك شغل مش هعلق ليك حبل المشنقة إلا بقى لو حد فاضي ومجاش ده موضوع تاني.
وأضاف: إحنا في مركب واحدة واللي ما تحتاجش قفاه دلوقتي هتحتاج وشه بعدين، واللي مجاش حطيته في القايمة السودة، وأنا ماكنش ناقص لي حد وكفاية إن ماجد المصري ييجي ويقف على المسرح ومصر كلها تشوفه وهو من أنضف الشخصيات اللي عرفتها في حياتي.
