محمد رمضان: بتعامل إني علامة تجارية في حد ذاتي.. ونجيب ساويرس ومحمد صلاح أصدقائي
تحدث الفنان محمد رمضان عن لقبه بـ نمبر وان والأغاني التي يقدمها، وبجانب ذلك حديثه عن صداقته بالمهندس نجيب ساويرس ولاعب الكرة محمد صلاح.
وقال محمد رمضان خلال حواره في برنامج ضيفي مع الإعلامي معتز الدمرداش: الجمهور اداني إشارة إنه حب أغنية نمبر وان اللي عملتها الأول في إعلان إحدى الشركات.. واللي عمل مسلسل الأسطورة وابن حلال ونسر الصعيد وقلب الأسد ينفع يعمل أغنية اسمها نمبر وان.
وأضاف محمد رمضان: مفيش مغني بيغني للذات.. المهندس هيبقى حابب يسمع أغنية نمبر وان والدكتور والنجار، ولقب نمبر وان بقى براند وبشكر سوق الإعلانات في مصر اللي من خلاله درست التسويق وعجبني الفكرة.
وعن سؤاله بأنه مؤمن بالفعل بـ لقب نمبر وان أم مجرد تسويق، ليرد قائلًا: لاء طبعا للتسويق وبتعامل أني علامة تجارية في حد ذاتي، وأنا منتج يمكن تقديمه بيبيع في السينما وفي المسرح وبيبيع في الدراما وبجيب إعلانات، ومفيش ولا فنان عربي عنده على يوتيوب 5 مليار مشاهدة.. أنا عندي 5 مليار و100 مليون وعلى تيك توك عندي 9 مليار.
واستكمل رمضان حديثه: وفي جملة قالها الشيخ محمد بن راشد بحبها أوي وهي "الناس متعرفش مين هو تاني شخص طلع على القمر الناس تعرف أول واحد.. عجبني الفكرة ليه منخدش السبق؟، ويمكن اللي بيميزني أني مش بخاف، ووصلت لمكان كبير في الدراما بعد مسلسل الأسطورة.
وعن أصدقائه وعلاقته بيهم: نجيب ساويرس والمهندس محمود الجمّال صديقي جدًا، ومحمد صلاح صديقي المقرب ويمكن الناس متعرفش ده وبنتكلم مع بعض علطول، وصلاح شخص مش متردد.
