الأولى على إعدادية كفر الشيخ: كنت بذاكر على جردل وعايشة على البلاط.. وبابا بقاله 6 سنين ميعرفش عننا حاجة
قالت منة الله عماد، الأولى على الشهادة الإعدادية في محافظة كفر الشيخ، إنها تواجه عواقب كبيرة في معيشتها، نتيجة الخلاف مع أسرة والدها، المنفصل عن والدتها منذ عامين.
عناء الأولى على إعدادية كفر الشيخ
وأضافت منة خلال تصريحات تليفزيونية: أنا عايشة على البلاط، وبذاكر على جردل.. الشقة فاضية مفيهاش أي مقومات للحياة، مؤكدة أنها تعاني منذ عامين.
وتابعت: عايشة أنا وماما وأخويا، لكن أخويا الصغير عنده 5 سنين مع جدتي في المنصورة، لأن والدي انفصل غيابي عن والداتي، وبقاله 6 سنين مبيسألش علينا.
وأكملت الأولى على إعدادية كفر الشيخ: في 2 إعدادي كنت بواجه مشاكل في الشقة، وفي 3 إعدادي أصريت إني أنجح، وواجهتني مشاكل كتير، زي إني مهددة بالطرد من البيت.
وأكدت منة أن والدها يعمل في إحدى الدول العربية، وهناك خلاف مع أسرة والدها، معقبة: أهل بابا أخدوا كل العفش من الشقة، حتى المرتبة اللي عندنا، وماما جابتها من جدتي، وهي وخالي اللي بيصرفوا علينا وأنا حطيت كل المشاكل دي قدامي عشان أذاكر وأحقق حلمي، ومفيش أي مقومات للحياة في الشقة، والدنيا كانت صعبة عليا جدًا في الشتاء، بسبب البرد، وإني بذاكر على البلاط.
وأردفت قائلة: والدي بقاله 6 سنين ميعرفش عننا حاجة، ولا بيصرف علينا، وبنعاني في المحاكم مع أهل والدي.
وأوضحت منة، أن والداتها الداعم الأساسي لها، فهي في مقام الأب والأم، مضيفة: نفسي أتفوق في الثانوية العامة واطلع الأولى على الجمهورية، وأدخل كلية طب.
