حسام داغر: مكانش ينفع نلغي مهرجان القاهرة للمسرح الجامعي.. وإسرائيل بقيت شر مُطلق
أوضح الفنان حسام داغر سبب عدم إلغاء الدورة الخامسة من المهرجان الدولي للمسرح الجامعي، مشيرًا إلى أنه كان من الصعب اتخاذ قرار بالإلغاء خاصةً بعد وصول الوفود الدولية من أجل المشاركة بمختلف المسابقات.
حسام داغر: ألغينا العرض الخاص لفيلم الخميس اللي جاي تضامنًا مع فلسطين
وقال حسام داغر خلال لقائه مع القاهرة 24: أعلنت إلغاء العرض الخاص لفيلم الخميس اللي جاي وده مش قراري أنا لوحدي، ده قرار كمان الشركة المنتجة وده تضامنًا مع اللي بيحصل مع شعب فلسطين وفي قطاع غزة ومينفعش نشوف أي نماذج احتفالية أثناء الأحداث ديه، أما بالنسبة للدورة الخامسة من مهرجان القاهرة الدولي للمسرح الجامعي مكنش ينفع يتلغي في آخر لحظة، اللي حصل في أي مهرجان تاني، أعتقد كان عشان لسه قدامهم وقت عشان يتعمل، لكن مجيش قبل الافتتاح بيوم ونلغي؛ لأن كان فيه ناس جات من بلاد.
وأضاف: احنا ماشيين بالتوازي مع القضية، ومعرضناش عرض فرقة رضا، ولغينا الفكرة، وخلينا العرض خاص بالقضية الفلسطينية، تضامنًا معاهم.
وأردف حسام داغر: شوفت الفيديوهات بعين كلها دموع، ويوميًا مش بعرف أنا من اللي بتأثر بيهم، اللي بيحصل شيء غير طبيعي وغير إنساني وغير آدمي، وهما تخطوا الحدود في الحروب، وبقى فيه شر مطلق، ومحتاجين وقفة إنسانية عشان الناس تشوف إيه اللي بيحصل ده.
