ويجز: بنشرح للناس أن الفلسطيني بني آدم.. واللي عايز يعوض اليهود يديهم مساحة من أرضه
استنكر مطرب الراب ويجز، ما يحدث للشعب الفلسطيني جراء حربهم مع المحتل الإسرائيلي، ومساندة الولايات المتحدة الأمريكية لـ إسرائيل، وطرد اليهود من أوروبا.
وقال ويجز في تصريحات تليفزيونية: أنا حاسس أن الموضوع صعب، إحنا نبدأ نشرح للناس أن الفلسطيني بني آدم؟ ده مش منطقي، أنا مش فاهم ليه إحنا محتاجين نطرد اليهودي من أوروبا ويجي يقعد في فلسطين؟، ما أنت لو بني آدم وعايز تعوضه طيب ما تدي له مساحة في أرضك.
وتابع ويجز: أمريكا أكبر شيء واقف ضد الفلسطنيين وضد كل شيء آدمي، يعني ضد أننا نوقف ضرب ونقتل، وضد إن يدخل ماية، هي واقفة كما السيف علشان الفلسطنيين مياخدوش حقهم، وفي جرائم لا تغتفر ومش بس المقاومة إحنا دورنا خارجي أكبر بكتير أوي، اللي أنا بحاول أفهمه أن ليه في ناس بتدفع فلوسها لـ إسرائيل علشان تقتل مجموعة من المدنيين، إحنا شوفنا أمريكا وهي بتحارب وشوفنا لما جابت أسامة بن لادن، وشوفنا أطفال بتموت ولكن مش بالشكل ده، إحنا في 2023 و8000 بني آدم يموتوا في أسبوعين ونكمل حياتنا عادي، ده مش طبيعي.
ويجز عن القضية الفلسطينية: فين الناس اللي بتتكلم عن حقوق البني آدم؟
وأضاف ويجز: أنا مش فاهم ليه وأنا مواطن فلسطيني أشوف جندي إسرائيلي وأنا في طريقي إلى المدرسة أو وأنا رايح أجيب أكل، هما اللي بدأوا الاعتداء من زمان، فين الناس بقى اللي بتتكلم على حقوق البني آدم؟ أنا نفسي أشوف مناصرين حقوق المرأة وحقوق الحيوانات، مين اللي بيحكم على البني آدم أنه يموت؟.
ويجز يعلق على تصريحات نتنياهو بأن الفلسطنيين أطفال ظلام
كما علق ويجز على تصريحات نتنياهو، بشأن أطفال فلسطين، قائلًا: حضرتك اللي مليان ظلام وغل وكراهية وعنصرية، علشان تقول على طفل عنده سنة طفل ظلام، يعني إيه؟ أنا مقدرش أقول كده على حد، يعني إيه طفل اختار الوضع اللي اتولد فيه؟.
واستكمل: إسرائيل قتلت كل أشكال الحياة في غزة، وكل العالم عارف أن إسرائيل بتقتل مدنيين، يعني هو يقتل 1 من حماس قصاد 2000 طفل يبقى كده بيحاب الإرهاب؟ اللي بيحصل ده لا يمت لليهودية بصلة، واللي بيحصل إبادة جماعية أصلها شيطاني وحرب على بني آدمين مالهمش في الأرض غير الأرض، ومعهوش حاجة غير إنه عنده سنتين أو إنها ست.
ويجز: مفيش 8000 بني آدم ممكن يموتوا والعالم يسكت غير في غزة
واستطرد: إسرائيل رافضة تحدد حدودها، يعني إيه دولة مش محددة حدودها؟، مفيش 8000 بني آدم ممكن يموتوا والعالم يسكت غير في غزة، إحنا قدام كيان غاصب وعنصري لأبعد درجة، والفلسطيني مينفعش يسيب أرضه.
