لو طلبت كيس شيبسي ومجبتوش كانت بتشتمني.. عريس المحلة يكشف معاناته مع زوجته قبل إنهاء حياتها| تحقيقات
كشفت التحقيقات في قضية مقتل عروس المحلة على يد زوجها، عن وجود خلافات بين الزوجين، منذ لحظة زواجهما، وسابقة وقوع مشادات كلامية بينهما، ومشاجرات منذ زواجها عام 2022، حتى انتهت المشادة الأخيرة بمقتلها.
قضية مقتل عروس المحلة على يد زوجها
ويستكمل القاهرة 24 نشر أقوال عريس المحلة المتهم بقتل زوجته، والذي أدلى بالتحقيقات قائلا: كنا في البيت على الساعة 11:50 بالليل تقريبا، أنا روحت غيرت للبيبي فقالتلي انزل هاتلي الدواء بتاع البرد فنزلت عند والدتي ملقتش عندها فطلعت تاني، وهي كانت في الحمام وفضلت أدور في الأدراج لحد ما لقيت مضاد حيوي ودوا برد، وادتهمالها فقالتلي أنت جايب الدوا ده منين؟، فقلتها ده من عند والدتي، فقاتلي لا انزل هاتهولى من الصيدلية، وده لأنها كانت سريعة الغضب على طول، كانت بتتعصب بسرعة من أقل حاجة، هي لو طلبت كيس شيبسي وأنا مجبتوش تقعد تتعصب وتشتم.
وواصل عريس المحلة المتهم بقتل زوجته خلال التحقيقات: فأنا كبّرت ومنزلتش وعملت نفسي مسمعتش حاجة، وبعدها لقيت الواد بيعيط وهي بتشخط فيه، وقالتلي يلا روح اعمله رضعة بدل ما أنت عديم الشخصية ودلدول، واعمل حسابك إن دي هتكون شغلتك، فأنا خدت الولا ورحت عملتله الرضعة وفضلت رايح جاي بيه وهي عمالة تشتم وأنا مبردش عليها، وهي بتقولي أنت مبتردش ليه هو أنت بتستفزني يعني؟.
وأكمل عريس المحلة: قامت شايلة علبة الموبايل وحدفاها عليا ناحية باب الأوضة، وهي كانت نايمة على السرير، فكان الطفل ساعتها خلص الرضعة وكان عايز البزازة بتاعته، فأنا رايح أخذها من جمبها فقامت مسكاها وحدفاها في الحيطة، فأنا روحت شيلتها وإديتها لابني وحطيته على السرير وقعدت كده على طرف السرير، فقامت قالتلي هات كدة تليفونك فقلتلها ليه؟، فقامت قالتلي علشان أكلم ابن خالتك أهزقه وأشوفه ماسك عليك إيه، علشان كده بتسمع كلامه فقلتلها لأ طبعا.
وذكر: فقامت ماسكة تليفونها ورايحة تبعت رسالة لأخوها علشان تقوله اشحنلي رصيد، فقمت رايح شادد منها التليفون، فقعدت تقول هات التليفون فقولتلها لا مش جایب حاجة وحلفت عليها فقامت قالتلي أنت بتحلف عليا أنا؟، فقامت شاتمة فقمت واخد التليفون ورايح أقعد برا على الركنة في الصالة، فندهت عليّا وقالتلي هات التليفون مردتش عليها فقامت قالتلي والله لأسوّد عليك يومك النهاردة.
وأضاف عريس المحلة المتهم بقتل زوجته خلال التحقيقات: فراحت على المطبخ ولقيتها جاية عليا بسكينة وكانت هتضربني بيها فأنا لحقتها ومسكت إيديها، وقمت واقف وزقتها وبعدها لقيتها بتقولي والله لأموّتك وشتمتني، في اللحظة دي كنا بنتخانق مع بعض فخبطت المروحة في كتفي فوقعت وبعدها حاولت أبعدها عني وأنا بزقها من رقبتها وحاطط إيدي على بوقها علشان تسكت، وعضيت صباع إيدها اللي كانت ماسكة بيها السكينة، وبرضو مسبتهاش وبعد كده زقتها ووقعت في الأرض ساكتة.
واختتم عريس المحلة: أنا ببص عليها لقيت دم على هدومها، فجريت مليت كوبيات ماء وحاولت أشرّبها بس معرفتش وكبيت ماء على وشها وبعد كده حاولت أعملها تنفس صناعي، وحاولت أعمل إنعاش على صدرها ولما لقيتها مفاقتش روحت رنيت على واحد صاحبي اسمه محمد، وقولتله على اللي حصل فقالي خليك زي ما أنت واوعى تحرك حاجة من مكانها وأنا هبلغ الشرطة وأجيلك دلوقتي، وفضلت أرن عليه أستعجله لحد ما جه ومعاه الشرطة، وبعد كده بصوا عليها وسألوني عن اللي حصل وأخدوني ونزلوا.
