الشاهد في قضية مقتل عروس المحلة: المتهم كلمني وقالي إن روان وقعت على الأرض ومبتتكلمش
يواصل القاهرة 24 نشر التحقيقات في قضية مقتل عروس المحلة على يد زوجها، والتي تضمنت اعترافات الشاهد على الواقعة وهو صديق الزوج المتهم، والذي أشار إلى تفاصيل محادثة المتهم له عقب إنهاء حياة زوجته، واللحظات الأخيرة في حياة عروس المحلة.
شاهد العيان في قضية مقتل عروس المحلة
وجاءت أقوال شاهد العيان حول الواقعة، كالتالي: اسمي محمد. ا. ع 41 سنة، وأعمل تاجر سيارات وقطع غيار سيارات ومقيم بالمحلة الكبرى، وبسؤاله عن معلوماته حول الواقعة، أجاب: اللي حصل أن يوم الواقعة 3-12-2023 يوم السبت بالليل حوالي الساعة 1:47 لقيت أحمد. ع بيتصل بيا علي التليفون المحمول بتاعي وبيقولي تعالى شقتي بسرعة لأن كان فيه خناقة بينه وبين مراته ومراته روان محمد عبد السلام واقعة على الأرض وفاقده الوعي ومبتتكلمش ولا بتنطق.
وأضاف الشاهد في أقواله: وهو مش عارف يعمل إيه وقالي تعالي عشان نوديها أي مستشفى فأنا قلت له حاول تفوقها لحد لما اجيلك فهو قالي إن هي فيها خبطه في بطنها وبسأله جت منين قالي إن هي كانت بتضربه بسكينة بس معرفش الضربة جت منين فانا قلقت من كلامه وقلت له أنا جايلك في الطريق واتصلت على القسم.
جريمة إنهاء حياة عروس المحلة
وأكمل الشاهد على جريمة مقتل عروس المحلة: وقلت له على اللي حصل فهو قالي إنه هيبعت ليه ضابط من القسم يقابلني على مزلقان الشعبية وأنا في الطريق أحمد. ع. ع اتصل عليا وقلت له إني جايب القسم ورايح له فقالي طب بسرعة علشان لو هنقدر ننقلها المستشفى ونلحقها.
واختتم: ولما رحت عند بيت أحمد. ع. ع اتصلت عليه وحدف ليا المفتاح بتاع البوابة لأنه في الدور الرابع وطلعت أنا ورجال القسم ولقينا روان مرميه على الأرض ومسكه في أيدها السكينة والضباط حاولوا يتكلمو مع أحمد. ع. ع لكن كان مرتبك والكلام مش واضح وخدوا أحمد. ع. ع على القسم والنيابة جت عملت معاينة في الشقة وده اللي حصل.
يذكر أن منطقة الشعبية بدائرة قسم ثان المحلة بمحافظة الغربية، شهدت واقعة مقتل زوجة المحلة على يد زوجها بطعنة نافذة في القلب أودت بحياتها، وتم القبض عليه وإحالته إلى جهات التحقيق، التي قررت إحالته إلى محكمة الجنايات.
