أبرز تصريحات نجوى فؤاد: هتبرع بـ أعضائي بعد وفاتي.. وأتمنى أروح لـ ربنا وحيدة وأعيش معاه حياة طبيعية
حلت الفنانة نجوى فؤاد، ضيفة على أحد البرامج التليفزيونية، وتحدثت خلال اللقاء عن تفاصيل حياتها الشخصية، ومشوارها الفني، وعلاقاتها بـ زملائها بالوسط الفني.
أبرز تصريحات نجوى فؤاد
- أنا بتمنى أروح لربنا وحيدة زي ما أنا، وأعيش حياة طبيعية مع ربنا.
- مش عايزة يتعملي عزاء، الناس بتكون مشغولة بالتليفونات ومش حاسين بالحزن، وأنا مش عايزة ده لنفسي.
- هكتب في وصيتي يتبرعوا بـ أعضائي، الجسد شيء فاني، ولما أتبرع بـ أعضائي هيكون عمل كويس ليا بعد ما أروح لـ ربنا، ولازم نؤمن إن الحياة لها نهاية.
- السبب الخاص اللي اتزوجني أحمد رمزي عشانه إنه كان عنده زوجة بيحبها جدًا ومطلق مراته، وهو إنسان لأبعد الحدود.
- اتجوزت عرفي كتير، وزواجي من أحمد رمزي كإننا كلنا عشوة وخلاص.
- اشتغلت مع محمد السبكي في فيلم حلاوة روح، وطلبت فلوس أداني 5 آلاف جنيه، لو بعتلي بوكية ورد كان أحسن.
- أنا صارفة على يسرا 3 مليون جنيه في بدايتها، ونسيت حاجة اسمها نجوى فؤاد، وأنا قد كلامي ونص، ولما بتسمع أني مريضة أو بعيد عليها بـ فويس، ترد عليا تقولي وأنتي طيبة وإزي صحتك، ومبتسألش عليا في تعبي.
- لو يسرا جت وأدتني الـ 3 مليون جنيه اللي صرفتهم عليها مش هاخدهم، أنا بحتاج لـ ربنا مش بشر.
- انتقادات الناس على صوري الجريئة قدام الأهرامات كانت ليا، لأني بعارض اللبس العريان زيادة عن اللزوم اللي أضافوه لينا الروسيات والراقصات الجدد بقالي 15 سنة، واقترحت يتحط شيفون ويكون الممنوع المرغوب ويجذب النظر، والصورة كانت إعلان لوزارة السياحة علشان مصر.
- في بعض الأقارب بدأوا يسألوا عليا علشان فات من عمري كتير، ولكن لعبهم على شونة ومفيش ورث ياخدوه، وأنا عديت بأزمات صحية كتير ومسألوش عليا.
- بعاتب المنتج جمال العدل، ولما بكلمه مبيردش عليا وأوقات كتير بكون محتاجة له، وكلمته في بداية تعبي وعمل معايا واجب كبير.
- ندمت أني دخلت الوسط الفني وضحيت أن يكون في أسرة وأولاد وأحفاد، كان هيبقى عندي حاجات كتير أوي أغلى من دلوقتي.
- أنا مش ندمانة على مشاهدي الجريئة ووقتها كان سني يسمح لها، إحنا جيل خربشنا كتير علشان نبقى نجوم، وجيل دلوقتي مبيتعبش وبياخدوا 10 مليون وإحنا خدنا 10 ملاليم.
- أعلى أجر أخدته كان 8 آلاف جنيه.
- مقدرش أعمل دور تلميذة بفيونكات وأنا عندي 70 سنة.
- الست اللي تتعرض لخيانة تسيبه أيًا كان والرزق على الله، خلاص لما تضيع الثقة بيضيع معاها حاجات كتير.
- أنا ظلمت نفسي في الـ 3 سنين اللي فاتوا، وكان المفروض أعمل حساب الزمن وأعمل حساب أني هتعب، مكانش عندي وعي بالحاجات دي.
- زعلانة من غادة عبد الرازق لأني كنت منتظرة مكالمة منها لأني بحبها أوي.
