علاء مرسي: يحيى الفخراني كنز فني.. ولديه حساسية مفرطة وأدب يُخجل من أمامه
تحدث الفنان علاء مرسي عن تعاونه مع النجم يحيى الفخراني في مسلسل عتبات البهجة، الذي عرض في النصف الأول من شهر رمضان المبارك.
ووصف علاء مرسي في لقائه مع القاهرة 24، يحيى الفخراني، بالكنز الفني، قائلًا: هذا العظيم كنز فني تمتلكه مصر والوطن العربي، هذا الكنز العظيم حالة خاصة من الأداء التمثيلي ولما يجي ممثل، أيا كان عنده موهبة أو قدر من الموهبة ويقف قدام يحيى الفخراني في مشهد بيستفيد استفادة كبيرة كما لو أنه دخل ورشة تمثيل.
وأضاف علاء مرسي: على المستوى الإنساني بيتمتع بحساسية مفرطة وأدب يخجل اللي أمامه، وإنسان بهذا القدر من العمر والتاريخ والسن، لما أدخل عليه وأسلم عليه فيتمالك نفسه علشان يقف واكتشفت أنه بيعمل كده مع كل كرو العمل، حتى لو معايا ضيوف يقول ويسلم عليهم.
وواصل علاء مرسي: يحيى الفخراني مش بيحب التصوير الكتير لأنه بيحافظ على الشخصية اللي قدام الكاميرا، ولكن أثناء التصوير أحيانا بيطلب منه بعض العاملين يتصوروا معاه وبيكون محرج لكنه مع ذلك بيوافق وبيتصور وهو محرج، وهذا إذا كان بينم فبينم عن شخص عنده حساسية تجاه الآخرين وأدب عظيم.
علاء مرسي: يحيى الفخراني هو اللي طلبني للمشاركة في عتبات البهجة
واستكمل: موهبته عظيمة وأستاذ كبير وكلنا بنفخر إننا عندنا موهبة زي يحيى، وتجربتي مهمة معاه، وهو اللي طلب ورشحني للمشاركة في العمل، ولقيت شركة العدل قالوا لي يحيى الفخراني عاوزك في المسلسل.
وعن قراءته للسيناريو قال: مش بقرأ الدور فقط ولكن بقرأ العمل بالكامل، علشان أشوف هصدق الورق والحدوتة ولا لاء، وده اللي اتعلمته وكنت محظوظ أني اتعلمته من عملاقة مريت عليهم في بداية مشواري زي إسماعيل عبد الحافظ وأسامة أنور عكاشة ومحمود أبو زيد ومحمود عبد الرحمن وإبراهيم الشقنقيري، واتعلمت منهم حاجات كتير وعلموني علشان تشتغل اقرأ الموضوع الأول لأنك مش هتقول كلمتين وتروح لكن شوف المحتوى الأول بالكامل مش دورك فقط.
