وسام هلال: النجم آلة تسويقية لـ الأغاني لكن مش بينجّحها
كشف المطرب والـ DJ السوري وسام هلال، عن الصعوبات التي واجهته أثناء غنائه باللهجة المصرية، بجانب الحديث عن إمكانية تعاونه مع مطربين مصريين آخرين، بعد تعاونه الأخير مع المطرب طارق الشيخ في أغنية حد سكة، التي طرحها خلال الأيام القليلة الماضية.
وقال وسام هلال في لقائه مع القاهرة 24: كانوا بيقولولي الجمهور المصري بيحب النجم من برا ييجي يغني باللهجة المصرية مظبوطة، ولكن أنا لقيت أنهم بيحبوا نغني بلهجتهم بالطريقة اللي تريحنا، أكيد مش نغلط في الألفاظ بس في احتضان بالموضوع، والناس بتحب الحاجة اللي بعملها بشكلي أنا، وأنا مبحبش أتظاهر بحاجة مش عندي، وإن شاء الله الجمهور المصري يحب لهجتي المصرية.
أما عن تعاوناته المقبلة مع الفنانين المصريين، فعلق وسام هلال: أحب أتعاون مع أي حد ناجح، إحنا اليوم في عصر الأغنية الحلوة مش عصر النجم، النهاردة فيه نجوم صف أول بينزلوا أغاني ومبتنجحش، ويجي ولد أو بنت معندهمش إلا أغنية واحدة أو ولا أغنية وينزلوا أغنية وبتطلع 100 و200 مليون مشاهدة على يوتيوب.
وأردف وسام هلال: أنا مع الأغنية الحلوة، وإذا تعاونت مع نجم أو نجمة مصرية صف أول والأغنية مش حلوة إيه الاستفادة، إحنا مش في عصر النجم، والنجم مبينجحش الأغنية هو بيكون زي آلة تسويقية للأغنية.
