الونش يكشف سبب رحيل فرجاني ساسي والمحترفين عن الزمالك
تحدث محمود حمدي الونش مدافع الزمالك عن نهائي دوري أبطال إفريقيا 2020 - نهائي القرن - أمام الأهلي، وبعض الأمور المتعلقة بمنتخب مصر.
تصريحات الونش
وقال الونش في تصريحات تليفزيونية: في 2019 الزمالك كان لديه فريق مرعب، الفريق كله جه مع بعض واحتاجوا وقت للتجانس.
وأضاف الونش: لما كنا بنلعب كل يومين كان كارتيرون بيبعتلنا طريقة الكرات الثابتة على الواتساب وإحنا كنا حافظين بعض، وبنضيع الوقت في الاستشفاء واللاعيبة كلها كانت واصلة لمرحلة فنية كويسة وغياب الاستقرار سبب رحيل اللاعيبة الأجانب.
وأكمل الونش: الجمهور عمره ما كره فرجاني ساسي ولكن اللاعيبة مش طول عمرها هتلعب عشان الجمهور، عشان كدة كانوا بيسيبوا النادي ويمشوا، بسبب غياب الاستقرار المادي والإداري.
وواصل الونش: نهائي القرن أكثر ماتش مأثر فيا، وموضوع المسحات والغيابات كان صعب علينا والزمالك كان أحسن وأجمد في الماتش وضيّع ولكن اللي بيرفع الكأس هو اللي بياخد كل حاجة، وأنا لعبت نصف النهائي أمام الرجاء وأنا مصاب بالغضروف وزعلت أكتر لأني مكنتش مشارك في نهائي القرن.
وعن محمود علاء، قال الونش: محمود علاء لو فضلت أتكلم عليه من هنا لبكرة مش هوفيه حقه وهو من الهدافين التاريخيين لنادي الزمالك وشخصية محترمة ولاعب كبير ومحالفوش الحظ في الفترة دي وبيستحمل الضغوطات لكنه حس أن جوميز جي عليه ومتعاملش نفسيا كويس في الجزء دا وكان لازم يبقا فيه تعامل مختلف معاه.
وأردف الونش: أوجه الشكر لـ حسين لبيب ومجلس الإدارة بالكامل ولما يبقا فيه استقرار مادي وإداري هيبقا فيه استقرار فني ودا اللي بيخلي أي فريق جامد.
وتابع الونش: عبد الله السعيد دخل أجواء الزمالك بشكل سريع وناصر وحمدي لعيبة كبيرة وبهنّي شحاتة على مستواه والفترة السابقة وأتمنى يشتغل على نفسه عشان المستوى مينزلش وهو بيتعلم وزياد كمال لعيب كويس.
وزاد الونش: اتكلمت مع أحمد حمدي والله يكون في عونه وإن شاء الله فترة وتعدي ويرجع في أسرع وقت، وساعة الإصابة هي أصعب حاجة وأول ما تعمل العملية خلاص أنت كدة في الراجع وأول ما تبدأ تتحرك وتنزل الجيم وتسيب العكازات فـ خلاص.
وعن منتخب مصر، اختتم الونش تصريحاته: حسام حسن إضافة كبير لمنتخب مصر وتاريخه يسمح له بالوجود في هذا المنصب ونفسي أمم إفريقيا ترجع تاني لمنتخب مصر وأروح كأس عالم والنهائيات اللي وصلنا ليها بنخسر ضربات جزاء وإحنا تعبنا في بطولة 2021 وبطولة الجابون أنا مكنتش موجود فيها لكن تعبنا فيها ووصلنا، وحكاية مباراة الإياب أمام السنغال كانت بسبب الحظ السيئ؛ “أنا خدت انذار اتوقفت وعبد المنعم خد كوع ومسافرش”، وفي الآخر ضربات الجزاء بتاعة ربنا.
