مي كساب عن حقيقة وجود خلافات خلال تصوير العتاولة: قررت محدش يستدرجني في مهاترات فاضية
تحدثت الفنانة مي كساب عن كواليس تصوير مسلسل العتاولة، الذي عرض في الموسم الرمضاني 2024، وكشفت حقيقة وجود خلافات خلال التصوير، إلى جانب حديثها عن كواليس مشاركتها في مسلسل أشغال شقة مع هشام ماجد.
مي كساب: مش فارق لي غير إني أنجح
وقالت مي كساب خلال لقائها في برنامج الراديو بيضحك عن حقيقة وجود خلافات مع فريق عمل مسلسل العتاولة خلال التصوير: بالعكس كنا حابين بعض، ومكانش عندنا مشاكل مع بعض، وأنا كان بقالي فترة كبيرة مقررة إن محدش يستدرجني لأي مهاترات فاضية، ولو فيه أي أجواء مش بشوفها ولا بلتفت ليها، وحتى لو التفت بيكون لمدة الوقت اللي حكيت فيه، وبعدين بطنش لأني جاية بشتغل وعاوزة أعمل فن ومش فارق لي غير إني أنجح.
وأضافت مي مساب: كانت الأجواء بيننا حلوة وكنا في نفس الأوتيل، وكنا بنقعد في الدور العشرين ومسميينه نادي النقابة، وكانت الروح الحلوة مسيطرة علينا وبنفطر مع بعض ونخرج مع بعض، وقلت إني كسبت إخوات خصوصًا علاقتي بمؤمن نور ومصطفى أبو سريع، وبأحمد كشك ومحمد محسن وعادل يوسف ومنة بدر تيسير وزينب العبد وشريهان، وكلنا كنا مع أحمد السقا 24 ساعة.
أما عن كواليس مشاركتها في مسلسل أشغال شقة قالت: المسلسل ده جزء من أبنائي.. من أول ما كان كتاب في الأسواق وأنا وخالد دياب كنا بنتكم عن المسلسل ده، وعدت السنين وفي الآخر هشام اللي عمله وبقيت جزء منه، ولما شركة الإنتاج كلمتني فرحت جدًا لأن بحب الشغل مع هشام، والكيميا بينا عالية وعلى المستوى الإنساني بحبه لأنه ابن أصول ومحترم، ومن الناس اللي تتمنى يكونوا في حياتك وبرتاح في الشغل معاه، وكنت في لبنان وجيت لهم والحمد لله إن الحلقتين عجبوا الناس.
