حجز جلسة محاكمة سائق أوبر المتهم بالتحرش بالفنانة هلا السعيد للحكم
حجزت محكمة الجنح بالشيخ زايد، جلسة محاكمة سائق أوبر، المتهم بالتحرش بالفنانة هلا السعيد على محور الضبعة، إلى جلسة 29 يوليو للنطق بالحكم.
التحرش بالفنانة هلا السعيد
وحصل القاهرة 24 على نص تحقيقات المتهم في واقعة التحرش بالفنانة هلا السعيد وجاءت أقواله كالتالي:-
اللي حصل إن أنا شغال سواق أوبر ويوم 22-5-2024 حوالي الساعة 11:30 صباحًا جالي طلب على تطبيق أوبر من استاذة هلا علشان أخدها من بفرلي هيلز في زايد وأوصلها لمدينتي وفعلا روحتلها وهي ركبت معايا وأول ما طلعت على طريق الضبعة لقيت العربية شطبت مني غاز وأنا عندي في العربية مشكلة في طرمبة البنزين فرحت مهدي وواقف على جنب علشان طرمبة البنزين تبرد شوية علشان متعطلش مننا وساعتها أنا استأذنت أستاذة هالة وهي قالتلي تمام.
وأضاف المتهم: وأنا بمجرد ما وقفت قلت عقبال ما العربية تبرد أنزل أعمل حمام في الشارع علشان أنا كنت محصور علشان أنا باخد أدوية علشان التليف العضلي اللي عندي وأنا ساعتها اتكسفت إني نازل أعمل حمام رحت نازل من العربية وروحت فاتح شنطة العربية ووقفت وراها علشان أداري فيها وأستاذة هالة متشوفنيش.
وأكمل المتهم: وأول ما فتحت حزام البطلون لاقيتها نازلة بتجري من العربية وعماله تصوت وتشاور للعربيات اللي ماشية في الشارع وأنا ساعتها قلتلها فيه إيه، أنا مش هعملك حاجة وروحت في ساعتها قافل حزام بنطلوني وحاولت أهديها بس معرفتش بس أنا كنت محصور جامد روحت سیبها وروحت بعيد ورا العربية وفاكك بنطلوني وعملت حمام في الشارع وبعد ما خلصت هي كانت لسة واقفة ومحدش كان راضي يقفلها ففضلت أهدى فيها وأقولها تعالي اركبي متخفيش أنا مش هعملك حاجة بس هي مرضيتش تركب معايا.
