محمد أنور: تعبت وشقيت في بداياتي وكنت بدور على وظيفة في شركة الكهرباء| فيديو
تحدث الفنان محمد أنور، عن بداياته الفنية، موضحًا أنه عانى رفقة أصدقائه بمسرح مصر، حتى توفرت لهم الفرصة الحقيقة قبل شهرتهم.
وقال محمد أنور خلال ندوته بـ القاهرة 24: إحنا شقينا وتعبنا، ومش بقول كده علشان الناس تقول أنت بتحكي قصة كفاح، بس لأ أنا بقول بجد لو أنت فضلت ورا حلمك بجد هتوصل وربنا هيكرمك، إحنا كنا بنقعد على القهوة فوق الـ 70 بني آدم، وقعدنا نقل والناس غصب عنها من ضغوط الحياة سابوا الشغلانة وفيه منهم راح يشتغل في شركة الكهرباء.
وتابع محمد أنور: أنا وأبطال مسرح مصر استنينا ومكناش عارفين أن الفرصة هتيجي، يمكن لو كانت إتأخرت شوية كمان كنا يأسنا، والله العظيم كنت بدور على وظيفة حكومية في شركة الكهرباء في نفس اليوم اللي جاتلي فيه مسرحية شيزلونج اللي كانت فاتحة خير عليا.
وواصل: إحنا مكناش متخيلين أن أستاذ أشرف عبد الباقي، يجيبنا في المسرح، إحنا بقالنا 15 سنة بنمثل مسرح عايزين نروح سينما بقى، وكنا بنعرض تياترو مصر أول كام يوم فيه إحنا مش عارفين أننا ممكن ننجح عن طريق المسرح.
واستكمل محمد أنور: كنا بنقول إن شاء الله كريم عبد العزيز وأحمد عز، يتفرجوا على المسرحيات ويختاروا ناس مننا، وأول مرة عرضنا فيها اللي حضر كان 4 أصحاب أستاذ أشرف واتكسف يقولهم ادفعوا.
محمد أنور: كنت بموت بسبب أحداث فلسطين.. وفيديو بكائي اتحذف قبل تعاقدي على مسرحية زواج اصطناعي
كما تحدث الفنان محمد أنور، عن أزمة حذف فيديو بكائه بسبب الأحداث الفلسطينية، قائلًا: أحداث فلسطين أثرت علينا كلنا بالسلب نفسيًا، أيًا كان حتى لو بتمارس حياتك بشكل طبيعي ولكنها هتفضل جوانا وإحنا لغاية دلوقتي فاكرين محمد الدرة، واللي بيحصل دلوقتي هيفضل مأثر فينا لـ سنين طويلة.
وأضاف: أنا من أكتر الناس اللي كنت بموت بسبب أحداث فلسطين، لدرجة أن الناس شافت أن مشاعري أوفر، اللي حصل تخطى حدود الإنسانية، إزاي تعمل في طفل كده؟ أنا مشاعري بقت أوفر أكتر بعد ما خلفت، وبحس بإحساس الناس اللي فقدت ولادها، وفكرة الفيديو اللي نزلته وأنا بعيط لأني عايز أوصل للناس اللي برا أن إحنا اللي مظلومين، فأنا كنت بعمل اللي أقدر عليه علشان أوصل للغرب، وإحنا أكتر شعب مرتبط بالقضية الفلسطينية بشكل مش طبيعي، خاصة أننا حاربنا إسرائيل وفيه بينا وبينهم دم.
واختتم: أنا كنت كل يوم بنزل حاجات عن فلسطين وفيه حاجات لسه موجودة وفيه حاجات إدارة الفيسبوك والانستجرام، والفيديو اللي كنت بعيط فيه بسبب أحداث فلسطين اتمسح بعد ما نشرته بـ ساعتين، وده كان من قبل موضوع مسرحية زواج اصطناعي.
