محمد أنور: كنت من أكتر الناس اللي بتموت بسبب أحداث غزة.. واللي بيحصل هيأثر فينا سنين طويلة
تحدث الفنان محمد أنور عن أحداث غزة وكيف أثرت عليه حتى الآن، مشيرًا إلى أن ما حدث سيظل له تأثير نفسي على الجميع لسنوات طويلة.
محمد أنور: كنت من أكتر الناس اللي بتموت بسبب أحداث غزة
وقال محمد أنور في لقائه مع القاهرة 24: اكتشفت أن أحداث فلسطين والأحداث اللي حصلت أثرت علينا بالسلب نفسيا حتى لو بتمارس حياتك بشكل طبيعي، وأنا عاصرت وأنا صغير فترة محمد الدرة وكانت أبسط من اللي بيحصل بمراحل والدنيا اتقلبت، ولحد دلوقتي فاكرينه واللي بيحصل هيفضل مأثر في نفسيتنا سنين طويلة.
وأضاف محمد أنور: وقت ما بدأ الحوار كلنا كنا بنموت وأنا كنت من أكتر الناس اللي بتموت لدرجة الناس كانت بتشوفني أوفر، لكن واللي بيحصل تخطى حدود الإنسانية والآدمية وكإنسان إزاي تعمل في طفل كده، وأنا علشان خلفت فالواحد مشاعره أوفر فبكون حاسس إحساس الأهل.
وأكمل: وقت الأحداث كنت بنزل كل ثانية حاجة وكنا بنحاول نوصل لبره إننا مظلومين لأنهم كانوا شايفين العكس، وإحنا أكتر شعب مرتبط بالقضية الفلسطينية والموضوع أكبر من أي دولة في العالم، وكنت من أكتر الناس المتأثرين بشكل غير طبيعي.
وعن الانتقادات التي تعرض لها لحذفه فيديو بكائه بسبب أحداث فلسطين، حيث زعم البعض أن السبب هو ترويجه لمسرحية زواج اصطناعي، أوضح: نزلت فيديو بكيت فيه ومش هو بس اللي نزلته فيه فيديوهات وحاجات كتير كنت بنزلها بشكل مستمر وموجودة لحد دلوقتي، وإدارة الفيس بوك كانوا بيمسحوا بعض الفيديوهات اللي فيها مشاهد دموية وفيديو البكاء اتحذف من إدارة فيس بوك بعد ساعتين من نزوله ومالوش علاقة بالإعلان عن المسرحية.
