حودة بندق: مكنتش بفهم في أرباح اليوتيوب وبقى معايا العربية اللي حلمت بيها
تحدث المطرب حودة بندق عن بدايته وكيف دعمه والده، مشيرا إلى أنه كان يغني منذ كان في سن الخمس سنوات.
وقال حودة بندق في لقائه مع القاهرة 24: والدي اكتشف موهبتي وبغني وأنا خمس سنين كمطرب محترف، وأول مرة دخلت استديو في 2005 بأغنية ليه الدنيا بتغير حال الناس.
حودة بندق: والدي كان شايف فيا حاجة كبيرة
وأضاف حودة بندق: كان عندي طموح وكنا أسرة على قد حالنا ووالدي كان شايف فيا حاجة كبيرة ولسه فيه طموح أكبر.
وواصل حودة بندق: كنت مطرب محترف رغم صغر سني لأني كنت شغال في مكان كبير مع ماما زيزي صاحبة مطعم سمك، والمطعم كان هو الانتشار الأكبر ليا لأن كل الفنانين كانت بتيجي فيه، وشافني فيه جورج وسوف وأصالة وشيرين وكلهم كانوا شايفني الطفل المعجزة وهكون نجم.
وبشأن أرباحه من أغانيه التي تحقق ملايين المشاهدات قال: الحمد لله معايا العربية اللي كانت حلم حياتي وفهمت أرباح اليوتيوب متأخر ودلوقتي بكسب منها.
وعن رأيه في مطربي المهرجانات الذين يتفاخرون بممتلكاتهم قال: مش بحب أعمل كده ومحدش يعرف عربيتي نوعها إيه غير الناس اللي بتشوفني في الشارع.
آخر أعمال حودة بندق
يشار إلى أن حودة بندق احتفل مؤخرا بنجاح أغنية روقان التي حققت نحو 40 مليون مشاهدة على يوتيوب وانتشرت بشكل كبير، وكان حودة بندق قدمها خلال أحداث مسلسل رحيل، بطولة الفنانة ياسمين صبري، والذي عرض في السباق الرمضاني 2024.
