ياسمين عز: اللي تتفرج على أحمد حلمي ومنى زكي هتتجوز جوازة حلوة
وجهت الإعلامية ياسمين عز، نصيحة للفتيات المقبلات على الزواج بالأخذ بنموذج زواج الفنان أحمد حلمي، والفنانة منى زكي، والابتعاد عن الحديث السلبي عن الزواج.
وقالت ياسمين عز، في مقدمة برنامجها كلام الناس، المذاع عبر شاشة قناة MBC: منى زكي وأحمد حلمي نقول الله أكبر عليهم ربنا يديم عليهم السعادة والمودة، بقالهم 22 سنة متجوزين وهما شباب وصغيرين مش جيل كبير 70 سنة، أكيد عينك واللي تحب تشوفه لو عايز تشوفه نموذج حلو هتشوف أحمد حلمي ومنى زكي، منى لما بتتكلم عن حلمي بتحس أنه شريك روحها، وهو لما بيتكلم عليها بتشوف كل الدعم والفخر في عينه، وقد إيه فرحان في نجاحها، نموذج موجود ولكن مش دايمًا بيكون مشاهير وبيطلعوا للجمهور.
وتابعت ياسمين عز: الناس تشوف نموذج جميل زي أحمد حلمي ومنى زكي، يقول الله بيدعم مراته ومش أي حد بيدعم نجاح مراته، ومنى زكي بتهدي له نجاحها، اللي تتفرج على نموذج زي ده يجيلها عريس حلو وتتجوز جوازة حلوة.
واستكلمت: متشفوش الأخبار، متتفرجوش على حاجة نكد، والأغاني خطيرة واللي بيسمع أغنية وبيردد كلامها الوحش بتحصله، خلي بالكم بتسمعوا إيه وبتغنوا وبتشوفوا إيه، أنا لما بشوف مسلسل فيه حزن وقهر مبتفرجش عليه حتى لو قالوا لي أنه مكسر الدنيا، بتفرج على الكوميدي والرومانسي إحنا مش ناقصين جراح.
وواصلت: الأغاني الرومانسية تخليكي مرغوبة ومحبوبة ويتمشي وراكي بالمشوار، اسمعي حاجات حب، لكن الحزن والمرار لأ يا أستاذة ده هيجبلك تعب في حياتك، والنبي قال تفائلوا بالخير تجدوه.
