حلمي عبد الباقي يتقدم بمذكرة لمجلس تأديب الموسيقيين: بتعرض لتعسف وإقصاء من الانتخابات| خاص
أعلن الفنان حلمي عبد الباقي، وكيل أول نقابة المهن الموسيقية، تقديمه مذكرة لمجلس التأديب بالنقابة، موضحًا فيها أنه تعرض للتعسف ومُنع من خوض الانتخابات المقبلة.
وقال حلمي عبد الباقي في تصريح خاص لـ القاهرة 24، إن محاميه سيتقدم غدًا بمذكرة يسرد من خلالها ما حدث له خلال الفترة الماضية في أثناء التحقيق معه بالنقابة، مرورًا بتعرضه للتعسف، وأيضًا منعه من خوض الانتخابات المقبلة.
وفي صباح اليوم السبت، خرج في فيديو عبر حساباته الرسمية بالسوشيال ميديا، ووجه رسالة لـ الفنان مصطفى كامل، نقيب الموسيقيين، بسبب إيقافه عن ممارسة نشاطه النقابي منذ 3 أشهر، على خلفية الأزمة بينهما وإحالته لمجلس تأديب وخضوعه للتحقيق.
حلمي عبد الباقي يخرج عن صمته
وقال حلمي عبد الباقي في الفيديو: أنا بقالي فترة ملتزم الصمت تمامًا ومبتكلمش في أي حاجة مع إني شايف حملة ممنهجة لتشويهي وبقول بكرة الحق يبان، سكت كتير وتحملت ما لا يتحمله بشر، وبشوف وبسمع التشويهات اللي عمري ما أتخيل إنها تتقال عن حلمي عبد الباقي، ولكن ده اللي حصل، عايز أقول إن المخالفات العلاجية اللي عندي حولوها على جهاز الكسب غير المشروع.
وواصل: موضوع غريب جدًا وعلى حد علمي لو حد خبير في القانون يقولي إن جهاز الكسب غير المشروع بيروحه الحرامي والمرتشي واللي بيتكسب من كرسيه ويتربح من تحت لتحت، إنما واحد تجاوزات علاجية بتروح للمستشفيات مابمدش إيدي على حاجة علشان أتربح منها، ومع ذلك امتثلت أمام اللجنة الموقرة في التحقيق وهما هيكتبوا تقريرهم قريب، في الجلسة الأخيرة شوفت تعنت غريب جدًا، أول ما قعدنا قالوا في مطالبة من مستشفى لسه جيالنا بأن في جواب أنت عامل له إعفاء لواحدة هتعمل عملية في عينها وأنت عامل لها إعفاء والجواب ده جالنا من أيام، أيام إيه الجواب ده من شهر 11 سنة 2024، يعني كلام غريب جدًا والمستشفى مابعتتش المطالبة من سنة و4 شهور؟، طيب إزاي؟.
وأضاف حلمي عبد الباقي: لأ هو الموضوع دوروا لـ حلمي على أي مصيبة، ومع ذلك أنا افتكرت كويس جدًا الجواب ده كنت اتكلمت مع النقيب وشخص كمان واتكلمنا والنقيب قالي الست دي غلبانة ونساعدها وعملت الجواب، ولما عملنا اطلاع على المخالفات.. الجواب ده مكنش موجود أصلًا، طالع دلوقتي ليه؟، وحصل إنكار ومش عايزين يكلموا الشخص اللي كان معانا في المكالمة.
واختتم حلمي عبد الباقي: فيه إقصاء لـ حلمي عبد الباقي إنه ميدخلش انتخابات سواء عضو مجلس أو يرشح نفسه نقيب وده حق شرعي لأي حد، وأنا تم إيقافي من 3 أشهر بأني لم أمارس مهامي النقابية دون أن يثبت عليا أي إدانة، هو أنا موظف؟، أنا عضو مجلس لما تثبت إداتني وقفني أو اشطبني من النقابة، أنت موقفني ليه بقالك 3 أشهر؟، هو ده قانون؟.. أنا مطلوب إقصائي من الانتخابات اللي جاية لا عضو مجلس ولا نقيب، أنا بتعرض لـ ظلم وقهر بشكل غير طبيعي ولكن بقول اللي ربنا عايزه هو اللي هيكون.
