عقب 24 ساعة من نشر صورته.. شاب من ذوي الإعاقة يعود إلى أسرته بعد 16 عامًا من الغياب
كشف رامي الجبالي، مؤسس أطفال مفقودة، تفاصيل عودة شاب من ذوي الإعاقة إلى أحضان أسرته بعد غياب لأكثر من 16 عامًا، عقب نشر صورته على صفحة المبادرة.
في منشور له عبر صفحته الشخصية، قال رامي الجبالي، إن طفل من ذوي الهمم تغيب عن أسرته وكان يعيش في دار رعاية منذ أكثر من 16 عامًا، ساردًا: «هو قال لهم أنا كمان هروح، أنا كمان هروح، بس محدش صدقه، السيد طفل من ذوي الهمم تغيب عن أهله وعايش في دار رعاية من أكثر من 16 سنة.. السيد من بعيد وقف يبص علي صاحبه اللي بيحبه من دار الرعاية اللي كان فيها وربنا أكرمه وأخيرا أهله عرفوا مكانه وبالفعل راحوا يستلموه.. وخلاص هيمشي ويسيبه».
وقال رامي الجبالي: «السيد واقف في صمت بيبص ويراقب.. وفجأة قال لهم (انا كمان هروح.. انا كمان هروح).. طبعًا المشرفين اللي من الدار وقفوا يبصوا له ويقولوا يا عيني.. ده بقاله 16 سنة هنا!، لما سألنا المشرفين هل هو دايمًا بيقول كده، كان ردهم (لا، أول مرة يقول كده).. يومين بالظبط، وتواصل معانا أسرة طفل مفقود من 16 سنة، عمرنا ما سمعنا عنه ولا نشرناه قبل كده.. ابوه لما عرف انهم هينشروا صورته عندنا كان رده «دا انا قلبت عليه الدنيا 16 سنة، هما دول اللي هيجيبوا التايهه!».
وتابع مؤسس أطفال مفقودة: «فعلًا نشرنا الصورة، وبعد أقل من 24 ساعة تواصل معانا مسؤلين من الدار اللي هو عايش فيها تقول لنا الولد عندنا، والغريب إنه دخل الدار بعد تقريبا 5 سنوات من تاريخ التغيب بتاعه بسبب حادث عربية، منعرفش السيد في الـ5 سنين دي كان فين، وايه اللي حصل، بس المهم اننا لقيناه الحمد لله.. المدهش هو عرف منين انه خلاص هيروح بيتهم، عرف منين إن أهله هتتواصل معانا.. اشمعنا دلوقتي، ومين قال له؟ ايه اللي بينه وبين ربنا، ليه كان متأكد وعنده اليقين ده ؟».
واختتم رامي منشوره داعيًا بعودة كل مفقود إلى أسرته، قائلًا: «صورنا لكم اللي قدرنا نصوره زي ما وعدناكم، عشان تفرحوا معانا ومعاهم، بس مهما وصفنا، اللحظة على الحقيقه غير.. مبروك رجوع السيد لأهله بعد أكثر من 16 سنة، حقيقي قصص المفقودين كلها عبر وكلها مفاجآت بس السيد غير، عقبال كل مفقود».
