فريدة سيف النصر عن منة شلبي: كلنا بنغلط.. والأفاعي اتلموا حواليها وملقيتش الضهر ولا النصيحة الصح
وجهت الفنانة فريدة سيف النصر رسالة لجمهور الفنانة منة شلبي، مطالبةً إياهم بالرأفة وعدم توجيه كلمات قاسية في محنتها التي تمر بها حاليًا، واتهامها بحيازة جوهر الحشيش المخدر بقصد التعاطي بعد إلقاء القبض عليها في مطار القاهرة، كما تمت إحالتها لمحكمة الجنايات لبدء المحاكمة، ومن ثم تحديد موعد أولى الجلسات لتكون 5 يناير المقبل.
وكتبت فريدة سيف النصر عبر حسابها على فيسبوك: منة شلبي.. منة الله قلبي عندك يابنتي.. كل ما اقرأ خبر.. لنا الرحمة والرأفة منك يارب.. البوست بيسألك إيه اللي في عقلك علشان نكتبه.. الحقيقة هو مش في عقلي هو في قلبي وروحي وماعرفش اسكت طبيعتي كده خلقة ربي وتربية لوزه أمي.. الأول هاطلب منكم الجدعنة المصريين جدعان والكلمة بتأثر بيسموها الرأي العام والسؤال.. الفنان لما يبقي في محنة بيحتاجكم أوي أنتم عملتوه بعد ربنا وهو بيبقي على أعصابه خايف تزعلوا عايز يرضيكم.. فهطلب منكم بلاش قسوة وحياة سيدنا النبي معلش.. افتكروا لنا أي مشهد ضحككم وإنتم زعلانين أو رواية كانت واقعية كأنكم عيشتوها.. خلوا الحب اللي كان جواكم يهدي مايثورش.
وتابعت فريدة: أيوة بنغلط كلنا بنغلط إحنا بشر فينا اللي بيكمل غلط وفينا اللي بيرجع من أولها وفينا اللي بينصحوه غلط ويغرقوه منهم لله.. وفينا اللي قدوته بهدلته وعقدته ومش شايف حياته الحلوة لأن جواه حياة شافها يتمنى إنه مايفتكرهاش بس مابيقدرش.. ومش بيصدق إن الناس بتنسى.. هو شايف نفسه اللي عارفها هو بس.. أكيد كلنا جوانا حاجة فيها آلام وذكرى مش عايز يفتكرها ولا حد يفكره بيها.. فما بالك لو فنان مشهور نصيبه كده أو نصيبها.. ماتبصوش على الابتسامة.. بصوا جوه العين في مشاعر صعبة مكتومة تخلي العين دامعة وتفهمها وفي عين باردة بلا تعبير لكن تدعي التعبير.. العين دي مش شايفة الناس بتبص لها ازاي بإعجاب وحب هي شايفة فقط حالة ماكانتش تتمنى تكون هي دي حياتها ولا تقدر تتخلى في نفس الوقت عن أقرب الناس.. مشاعر متضاربة تحسسه بأنه قليل وهو مايعرفش أنه بقي مهم وماضيه مايهمش حد.. الصراع ده بيخليه يهرب.. فبيهاجر.. فبيغير كل اللي حواليه ويبدأ من جديد.. وفي اللي صحاب السوء يقولوا له زي أفلام زمان خد لك كاسين تنسى.. أو نفسين وكبر دماغك منهم لله شياطين الإنس.
وسردت فريدة سيف النصر قصة حياة منة شلبي، قائلةً: تعالوا احكي لكم حدوتة صغيرة.. كان يا مكان واحده ست شغلتها تسعد الناس وتحيي الأفراح والليالي الملاح.. ربنا رضي عنها عشان طيبة وإداها راجل ابن ناس حبها واتجوزت ومنّ الله عليها وخلفت بنت زي القمر فعلا منة الله لها.. كلنا شفناها وهي بيبي.. بدر منور كله براءة.. وكبرت وفي المدرسة ذاقت المر طفلة بريئة بتتعاير ويقسون عليها.. وطلبت من أمها تسيب شغلها ووافقت الأم الطيبة.. ما هو كله مقدر ومكتوب.. وكبرت البنت القمر.. ودخلت نفس المجال دون أن تدري إنه القدر.. وكانت جذابة ومحبوبة ويوم ورا يوم موهبتها وجمالها وطيبتها خلاها نجمة في ضوء القمر تنور.. لكن جواها إيه الله أعلم بيها.. وولاد الحرام ماسابوش البنت الصغيره في حالها.. اتلموا زي الأفاعي حواليها زي ما اتلموا على كتير غيرها.. طبعا ماهم بيتلموا على الناجح اللي لوحده ومكسبه.. وعلموها تنسى إزاي اللي مضايقها بطريقتهم.. منهم لله.. حبيبتي مالقيتش الضهر ولا النصيحة الصح.. في وجود أم من كتر خوفها وحبها مابتقدرش تزعلها.. ووقعت البنت في مشكلة مش سهلة.. لكن ماتقصدهاش.. لكن احتمال اللي كانوا معاها في رحلتها يقصدوها.. الله أعلم.. دي محنة يا جماعة.. أكيد هي والأم في حالة يارب ماحدش يشوفها.. وغلاوة النبي بالراحة.
وأردفت فريدة: السجن صعب على حد طول عمره مسجون جوه نفسه بصوره معينة.. غير صورته في عيون الناس.. أنا كأم بقول إلهي مايقع لكم غالي في ضيقة.. والبنت دي بنتنا كلنا.. أخت ولادنا كلنا.. والنبي ماحدش يشمت ولا يغلط.. وبتمنى من ربنا ومنكم يا أجدع وأطيب مصريين ماندبحهاش.. كله سلف ودين..ويارب ارزقنا بمن يحكم بإنسانيته وليس بالقانون.. القانون وضعوه الفرنسيين.. لكن الإنسانية والرحمة وضعها قانون الله.. وللعلم كل اللي هايقول علشان فنانة لا والله وماتقارنش بحالات تانية أرجوك.. تخيل بنتك لا قدر الله أو أختك أو زوجتك في موقف ما مش لازم زي ده وأول مرة تغلط.. أعالج أعاقب غرامات جامدة.. أديهم خدمة مجتمعية شاقة إجباري.. تحديد إقامة مدة ما بجهاز تعقب.. أي شيء والله العظيم عن نفسي أشارك فيه وأراقب.. لكن كرامة للنبي ورحمته وعفو الله بلاش بهدلة السجون.. ولاحول ولا قوة إلا بالله العلي العظيم.. أنا قولت اللي في ضميري وربنا عنده كله مكتوب.. يامن أمره بين الكاف والنون.. اعفو عنها وقل كن فيكون..وصل الله على سيدنا محمد صلاة تفك كرب كل مهموم.. آمين آمين آمين.. ورجاء مش عايزه حد ينسى وهو قادر يقف جنب حد.. إننا دلوقتي عليها وفي أقل من ثانيه بنبقي تحتيها.. وما دائم إلا هو.
