شيرين عبد الوهاب: معرفش عايشة إزاي أنا اندعكت في الدنيا.. ودلوقتي ماضية مع شركة ربنا
تحدثت الفنانة شيرين عبد الوهاب، عن عودتها من جديد لجمهورها خلال الفترة الماضية، معربة عن امتنانها الكبير لجمهورها، موضحة أنها لا تعلم كيف مرت بكل هذه الصعوبات في حياتها.
وقالت شيرين عبد الوهاب في لايف عبر حسابها الرسمي بموقع تيك توك: مفيش حاجة طبطبت عليا غير ربنا، وربنا كرمني، وفيه ناس مش مصدقة إن كل اللي حصل ده اجتهاد وتوفيق من رب العالمين، وأنا دلوقتي ماضية مع شركة ربنا.
وتابعت شيرين عبد الوهاب: كويس إني عايشة، مش عارفة أنا عايشة إزاي لغاية دلوقتي، الإنسان مش لازم يمر بتجارب حب، من وأنا عندي 13 سنة بشتغل ودلوقتي أستحق الراحة والدلع، ولو عملت كتاب هعلمهم إزاي حد شاف اللي أنا شفته وربنا كرمه، أنا اندعكت في الحياة وقررت أني أعيش، شغلي وجمهوري أكتر ناس علوا مقامي وعندي ليهم أغاني وأفكار حلوة.
شيرين عبد الوهاب: عملت في مشواري اللي رضاني.. ودلوقتي حابة أركز مع عائلتي
وأضافت شيرين عبد الوهاب: أنا عملت الحمد لله في مشواري الفني اللي رضاني ورضا الجمهور، ودلوقتي حابة أركز مع عائلتي، وطبعًا الحفلات والترفيه وحاجات علشان رمضان وإعلانات، وسقف أحلامي مبينتهيش، وأنا راضية باللي عملته ولكن ساعات بقول أنا معملتش حاجة خالص، والثقة بتيجي من عند ربنا ولكني شاكة في اللي بعمله.
شيرين عبد الوهاب: اللي جاي كله أغاني حب
وأوضحت شيرين عبد الوهاب، أن الأغاني التي ستقدمها لجمهورها خلال الفترة المقبلة أغاني حب، قائلة: بقول لجمهوري إن كل اللي جاي أغاني حب، لأني مبسوطة وهفضل مبسوطة، وكل اللي بيسمعوني هأثر عليهم لأني مبسوطة.
