طريقة عمل كحك العيد السادة الناعم.. السر في نص السمنة البارد

تتصدر طريقة عمل كحك العيد السادة الناعم، عمليات البحث عبر الإنترنت في الوقت الحالي استعدادًا لعيد الفطر المبارك، وهو الكحك الذي يعد أساسيًا لدى المصريين للاحتفال بالعيد، ودائمًا ما تتمنى ربة المنزل نجاح طريقتها للحصول على الكحك الدايب الناعم، والطعم المضبوط. وتتبع المخابز خطوات وأسرار تتحكم في طريقة عمل كحك العيد السادة الناعم وهي سر نجاح الكحك، حيث يكون محتفظا بشكله وقوامه الناعم، مع ميزة ذوبانه في الفم عند تناوله.

 وعبر التقرير التالي نعرض وصفتين من وصفات طريقة عمل كحك العيد السادة الناعم، يمكنك الاختيار من بينهما.

طريقة عمل كحك العيد السادة الناعم

هناك أكثر من وصفة لـ طريقة عمل كحك العيد السادة الناعم، أشهرها طريقة السمن الساخن، فعلى الرغم من أن المخابز تستخدم طريقة نصف السمن الساخن ونصف آخر بارد، إلا أن طريقة السمن المقدوح أيضًا أثبتت نجاحها في الحصول على الكحك الدايب الناعم:

مقادير كحك العيد الدايب 

•  1 كيلو دقيق
•  نص كيلو سمنة + معلقة زيادة
•  كوبايه إلا ربع ميه أو لبن
•  3 معالق كبار سمسم محمص
•  2 معلقة كبار سكر بودر
•  2 معلقة كبار لبن بودر
•  معلقة متوسطة بيكنج باودر
•  نص معلقة ريحة كحك
•  رشة ملح

لعجينة الخميرة

•  معلقة صغيرة خميرة
•  معلقة صغيرة سكر
•  تُخلط مع الميه وتُترك تتفاعل

طريقة عمل كحك العيد السادة

1. اخلطي المكونات الجافة مع بعض واعملي تجويف في النص

2. سخني السمنة وصبيها على السمسم في التجويف وقلبي بمعلقة مش بإيدك

3. سيبي الخليط يهدى شوية، وبعدين بسيه بإيديكي مدة ربع ساعة على الأقل لحد ما يبقى ناعم زي الكريمة

4. أضيفي الميه والخميرة وقلبي من غير عجن قوي

5. سيبي العجينة ترتاح 10 دقايق بالكتير

6. كوري قطع 30-35 جرام، وشكليها وبصميها

7. دخلى الصواني فرن ساخن 180 درجة من 15 لـ 18 دقيقة رف وسط

8. اتركي الكحك يبرد تماما قبل نقله من الصواني ولا ترشي السكر البودرة إلا عند التقديم

 أسرار نجاح كحك العيد بالخميرة

• البس ربع ساعة هي سر الكحك الدايب — دي أهم خطوة خالص
• الميه أفضل من اللبن لأنها بتخلي الكحك يعيش أطول
• لو الكحك بيتشقق كتير أضيفي معلقة سمنة زيادة
• الحشوة لازم تكون قطع صغيرة عشان الكحك ما يفرقعش في الفرن
• لفّي الصينية في الفرن عدة مرات لـلون موحد
• الكحكة قبل التسوية 38 جرام وبعدها 30 جرام
• الكمية بـ 3 كيلو دقيق بتطلع كمية كبيرة جدًا

طريقة عمل الكحك الناعم بالكيلو

أما طريقة عمل الكحك الناعم بالكيلو مثل المخابز والشيفات، فيعرضها الشيف جابر كوصفة معتمدة ومضمونة تتبعها المخابز للحصول على كحك العيد السادة الناعم والمحشو بحشوة طرية وناجحة بعد التسوية:

مقادير كحك العيد السادة الناعم

• 1 كيلو دقيق
• ربع كيلو سمنة تسخن على النار
• ربع كيلو زبدة تترك باردة
• 45 معالق سمسم عادي (مش محمص)
• معلقة خميرة فورية (أو أقل)
• معلقة سكر
• نص كوبايه ميه + ميه للعجن حسب الحاجة
• نقطتين ريحة كحك

 للعجوة

•  عجوة
•  2 معلقة زبدة

طريقة عمل كحك العيد السادة الناعم

1. ذوبي الخميرة مع السكر في نص كوبايه ميه وسيبيها تتفاعل

2. حطي الدقيق والسمسم في وعاء كبير

3. صبي السمنة الساخنة على السمسم والدقيق وقلبي خفيف لحد ما تتخلط

4. أضيفي الزبدة الباردة وابدئي فرك الدقيق بإيدك لحد ما اللون الأبيض للدقيق يختفي خالص

5. أضيفي ميه الخميرة وابدئي العجن بشكل خفيف مش زي عجن البيتزا

6. أضيفي ميه بالتدريج لحد ما العجينة تمسك نفسها وما تشققش

7. اختبري العجينة، كوّري قطعة، لو اتلفت من غير ما تتشقق يبقى مظبوطة

8. كوّري العجينة والحشوة بنفس المقاس، احشي وأقفلي مع مراعاة تساوي سمك العجين من كل الجهات

9. ابصمي بالمصفة أو أي بصمة عندك

10.دخلي الصواني فرن ساخن 180 درجة لمدة 20 دقيقة

11. سيّبه يبرد تماما ورشي سكر بودر عند التقديم فقط.

  أسرار نجاح كحك العيد الناعم

•  سر الريحة الجميلة: نص السمنة ساخن ونص بارد هو الزبدة، السمنة الساخنة كلها بتخلي الريحة تطلع في الفرن وتضيع
•  سر القوام الناعم المرمل: فرك الدقيق بالسمنة والزبدة كويس قبل إضافة الميه
•  الخميرة معلقة واحدة بس لكل كيلو، الزيادة بتعمل غازات وما بتفيدش
•  العجوة لازم تُعجن مع 2 معلقة زبدة عشان ما تنشفش وما تتحرقش جوه الكحك، والحشوة لازم تكون صغيرة، الكحك بيكون أحلى لما طعم العجين أكتر من الحشوة
•  كيلو دقيق بيطلع حوالي 45 كحكاية